"Azərbaycan öz böyük hədəflərinin realizasiyası mərhələsinə daxil olub"Azərbaycan hazırda özünün Böyük Oyanış və Dirçəliş mərhələsini yaşayır. Biz bu günlərdə ən mühüm tarixi hadisələrin baş verməsinə şahidlik edirik. Dövlət başçısının mayın 10-da Naxçıvan Muxtar Respublikasına səfəri zamanı bir sıra önəmli mesaylar verməsindən sonra, onun Birinci vitse-prezident Mehriban Əliyeva ilə birlikdə mədəniyyət paytaxtımız Şuşaya səfər etməsi, açılış və təməlqoyma mərasimlərində, festivalda iştirak etməsi çox böyük bir geosiyasi və mədəni-iqtisadi strategiyanı gerçəkləşdirməyimizin tərkib hissələridir. Prezident İlham Əliyevin hazırda həyata keçirdiyi siyasət planlı siyasət, sistemli və məqsədyönlü siyasət olması ilə diqqəti cəlb edir. Azərbaycan öz böyük hədəflərinin realizasiyası mərhələsinə daxil olub.

Biz indi 30 il davam edən işğalın ağır sıxıntılarından, ağrı-acılarından sonra tariximizin ən gözəl günlərini yaşayırıq. Bu ilki Ramazan bayramımız Qarabağlı ilk Ramazanımız oldu. Və nə xoş təsadüf ki, bayram bayrama qarışdı. Şuşa şəhərində müqəddəs Ramazan bayramı qeyd olundu, bayram namazı qılındı, "Xarıbülbül" festivalı keçirildi. "Xarıbülbül" festivalında Prezident İlham Əliyevin çıxışında vurğulanan məqamlar və ölkəmizin hər yerindən Şuşaya gələn yaradıcı kollektivlərin ifaları həm ermənilərə dağ çəkdi, həm də Azərbaycanın mədəni potensialını, multikultural yaşam tərzini bir daha bütün dünyaya göstərdi. Hamımız möhtəşəm festival görüntülərini və Şuşadakı atəşfəşanlığı xüsusi qürur hissilə izlədik. Əlbəttə, bütün bunlar hamısı möhtəşəm tarixi anlardır.

Xalqımıza böyük sevinc və qürur hissi yaşadan bu bayram törənlərinin təşkil edilməsində heç şübhəsiz ki, Birinci vitse-prezidentin rolu və əməyi ayrıca qeyd edilməlidir. Belə ki, Heydər Əliyev Fondunun məhz Mehriban Əliyevanın rəhbərliyi ilə təşkil etdiyi festival konsertinin proqramı sadəcə zövqlərimizi oxşamadı. Prezidentin çıxışı və möhtəşəm “Bayatı-Şiraz” muğamı ilə açılan “Xarı bülbül” festivalı Nikol Paşinyan-Anna Akopyan kimi miskin və uğursuz cütlüyün idarə etdiyi işğalçı ölkəyə Azərbaycanın ən layiqli cavabı oldu. Eləcə də Şuşanın ən gözəgəlimli yerində rəmzi əhəmiyyət daşıyan məscidin Prezident tərəfindən təməlinin qoyulması da işğal dönəmində Qarabağın müxtəlif guşələrində 63 məscidimizi dağıtmış erməni vandallarına və onları himayə edən Fransa, Kanada kimi islamofob ölkələrə cavab xarakteri daşıyır. Bu məscid həm də Şuşamızın milli-mənəvi koloritini daha da zənginləşdirəcək və bu şəhərin müsəlman dünyasının mədəni mərkəzlərindən birinə çevrilməsinə bir növ körpü olacaq.

Bütün Türk-İslam dünyasının mədəniyyət paytaxtı statusunu daşımaq imkanlarına malik olan Şuşanın parlaq gələcəyinin təməli məhz bizim günlərdə cənab Prezident tərəfindən qoyulur. Şuşa özündə bütün Qarabağımızın müsbət aurasını, kosmoenerjisini birləşdirir. Bu şəhərin tam fərqli aurası var. Bunu cənab Prezident Şuşada jurnalistlərlə söhbətində qeyd etdi. Şuşa bütün Qarabağın lokomotivi rolunu oynayır. Şuşa dirçəlirsə, bu bütün Qarabağın dirçəlişi deməkdir. Şuşanın bərpası və yenidənqurulmasının Ermənistanın hakimiyyət və müxalifət dairələrini, revanşist qüvvələrini qıcıqlandırması da məhz bundan irəli gəlir. Düşmən Şuşanın işğaldan azad edilməsi faktı ilə heç cürə barışa bilmir. Lakin Ali Baş Komandanımız Hadrutu, Şuşanı yenidən ələ keçirmək çağırışları ilə çıxış edən düşmən ölkənin revanşist qüvvələrinə növbəti dəfə qəti xəbərdarlığını etdi, “Dəmir yumruğ”umuzun yerində olduğunu bildirdi.

Bundan sonra Şuşada yalnız yeni nəfəs, yeni həyat, sülh, və əmin-amanlıq hökm sürəcək. Mədəniyyət paytaxtımızda yerli və beynəlxalq miqyaslı bayramlar, festivallar, mədəniyyət tədbirləri keçiriləcək. Cıdır düzünə bir daha heç vaxt işğalçıların ayağı dəyməyəcək. Prezident də festivaldakı çıxışında dedi ki, “Cıdır düzündə - hər bir azərbaycanlı üçün müqəddəs olan yerdə yığışmışıq və bu musiqi bayramını, bu birlik bayramını, bu qayıdış bayramını, bu ləyaqət bayramını qeyd edirik”. Bu sözlər sıradan bir söz deyil. Bu sözlər Şuşanın hansı ölkəyə, hansı xalqa mənsubluğunu təsdiqləyən sözlərdir. Ermənistanda olan bəzi siyasi qüvvələrin seçkiqabağı dönəmdə Azərbaycanın beynəlxalq aləmdə tanınmış ərazilərini yenidən işğal etməyin mümkünlüyü barədə bəyanatlarla çıxış etməsi ilk növbədə Ermənistanın özü üçün təhlükəlidir. Erməni siyasətçilərində ağıl varsa, Şuşada “Xarıbülbül” festivalının keçirilməsini və bayram namazının qılınmasını tarixi ədalətin qalib gəlməsi kimi qiymətləndirməlidirlər. Bütün işğalların sonu işğalçıların məğlubiyyəti ilə bitir. Erməni xalqı və erməni siyasətçiləri bundan ciddi nəticə çıxarmalıdır.

Əlisahib Hüseynov,
Milli Həmrəylik Partiyasının sədri
Fransa prezidentindən Azərbaycana qarşı ƏSASSIZ İTTİHAMATƏT-in Minsk qrupunun həmsədri olan Fransada Azərbaycana qarşı növbəti qərəzli addım atıb.

Avrasiya.net xəbər verir ki, ermənipərəst mövqeyi ilə tanınan Emmanuel Makron öz Facebook səhifəsində Azərbaycana qarşı əsassız iddialar səsləndirib.

“Azərbaycan Silahlı Qüvvələri Ermənistan ərazisinə daxil olub. Onları dərhal ərazidən çıxarmaq lazımdır”-deyə Makron erməni dilində yazıb.

Fransa prezidenti Ermənistan dostluq mesajı da göndərməyi unutmayıb.

“Mən bir daha erməıni xalqına deyirəm ki, Fransa onlarla həmyəkdir və belə də qalacaq”.



Sərhəddə gərginliyin arxasında hansı plan ola bilər? - TƏHLİLAzərbaycan Ordusunun işğal dövründə qanunsuz irəli çəkilmiş dövlət sərhədini bərpa etməsi Ermənistan tərəfindən gərginlik ocağına çevrilir. Paşinyan Təhlükəsizlik Şurasının iclasını çağırdı, Ermənistan XİN rəhbəri rusiyalı həmkarı Sergey Lavrova, ATƏT-in fəaliyyətdə olan sədrinə zəng etdi, daha sonra rəsmi İrəvan Kollektiv Təhlükəsizlik Müqaviləsi Təşkilatına “dövlət sərhədimizə müdaxilə var” iddiası ilə müraciət ünvanladı.

İrəvanın zəng trafikinin ardınca Lavrovla Ceyhun Bayramov məsələni müzakirə etdi, Bayramov ATƏT sədri Ann Linde ilə də eyni mövzudan danışdı.

Baş verənlər suallar yaradır və diqqəti prosesin təkcə İrəvandan idarə olunmadığı fikrinə yönəldir.

- Dövlət sərhədinin bərpa edilməsi ilə bağlı şifahi razılaşmalar var, Ermənistan niyə indi məsələni bu qədər gərginləşdirdi?

- Bütün bunların Lavrovun bölgəyə səfərindən sonra olması təsadüfdürmü?

- Ermənistanın KTMT-yə müraciətini əslində necə oxuya bilərik?

Gərginliyin yaradılmasının Ermənistan hakimiyyətinin maraqları kontekstində birdən çox səbəbi görünür:

a) Müharibədən sonra dövlət sərhədinin bərpası ilə razılaşan Paşinyan seçkilərə getdiyi vaxt Ermənistan cəmiyyətində ajiotaj yaradan bu məsələdə geri çəkilmək istəmir və prosesin sonunda istədiyinə nail ola bilməsə belə, ən azından çalışdığını göstərə biləcək;

b) Sərhədin bərpası qaçılmaz olacaqsa, KTMT-yə müraciət nəticəsiz qalacaq, lakin Paşinyan bundan seçki öncəsi Rusiyaya sığınan əsas rəqiblərinə qarşı istifadə edə bilər;

c) KTMT-yə müraciət nəticə verməyəcəksə, Nikol seçkidən sonra bu faktı Rusiyadan uzaqlaşmaq üçün səbəb kimi göstərə bilər;

Lakin gərginliyin Lavrovun bölgəyə gəlişindən dərhal sonra yaşanması və məsələnin KTMT-nin gündəliyinə çıxarılması prosesdə rusların izinə diqqət çəkir. Mümkündür ki, Rusiya xarici işlər naziri regiona səfərində, xüsusilə Bakıda istəyinə nail ola bilmədi, görüşdə səslənən fikirlər və rəsmi Bakının mövqeyi də bu fikri gücləndirir. Və Rusiya bölgədə zəifləyən təsir vasitələrini gücləndirmək üçün yeni gərginlik ocağı yaradır və bunun dövlət sərhədində olmasının uzaqmənzilli hədəfləri var.

1. 30 il ərzində Qarabağ münaqişəsindən Azərbaycan və Ermənistanı öz orbitində saxlamaq üçün istifadə edən Rusiyaya yeni münaqişə ocağı, ən azı mübahisəli məsələ lazımdır. Üçtərəfli razılaşmalar və Azərbaycanın israrlı mövqeyi Qarabağda sülhməramlıların nəzarətindəki bölgələrin uzunmüddətli perspektivdə rıçaq olaraq istifadə etməyi çətinləşdirir.

2. Niyə Laçın-Gorus sərhədindəki Qaragöl hövzəsi? İstisna deyil ki, Lavrov sərhədlərin demarkasiyası məsələsini İrəvanda və Bakıda müzakirə edib və İrəvanda Ermənistanın, Bakıda Azərbaycanın mövqeyinə uyğun mövqe sərgiləyib. Bu, həmin bölgədə hər iki tərəfin öz mövqeyində israrlı olmağa həvəsləndirmək gedişi ola bilər. Rusiya yaxşı bilir ki, bu bölgə SSRİ vaxtında da mübahisəli ərazi olduğu üçün iki ölkə tərəfindən müştərək qərarla qoruq kimi istifadə edilirdi. İndi bu bölgə Azərbaycan və Ermənistan sərhədində mübahisəyə çevrilə biləcək ən optimal ərazilərdən biri ola bilər.

3. Yeni mübahisənin dövlət sərhədində yaradılması, prosesə KTMT-nin qoşulması Qarabağdan fərqli olaraq, məsələnin hərbi yolla həllini çətinləşdirir və bu, Rusiyanın “hakim” roluna şərait yaradan amildir.

4. Prosesə KTMT-nin qoşulması həm də təşkilata üzv olan türkdilli ölkələrini Bakı və Ankara ilə münasibətdə çətin vəziyyətə sala, Rusiyanın “zəif qarnı” olan Mərkəzi Asiyada güclənən türk birliyinin önündə maneələr yarada bilər.

Lavrovun gedişindən sonra sərhəddə yaranmış gərginlik və Ermənistanın KTMT-yə müraciəti Paşinyanın seçki planından daha çox, 30 ildə ilk dəfə Cənubi Qafqazda mövqeləri bu qədər zəifləyən rusların oyunu kimi görünür.

Asif Nərimanlı
Şuşada Heydər Əliyev, İlham Əliyev və Rəcəb Tayyib Ərdoğana heykəl qoyulsun - TƏKLİFMilli Məclisin Təbii ehtiyyatlar, energetika və ekologiya komitəsinin sədri Sadiq Qurbanov Şuşa şəhərində Heydər Əliyev, İlham Əliyev və Türkiyə Prezidenti Rəcəb Tayyib Ərdoğana heykəl qoyulmasını təklif edir.

“Təklif edirəm ki, 28 illik işğaldan sonra azad olunmuş Şuşada - Azərbaycanın müqəddəs qala-şəhərində Ulu öndər Heydər Əliyev, Müzəffər Ali Baş Komandan İlham Əliyev və misilsiz qardaş dəstəyilə 44 günlük müharibədə Böyük Qələbəmizin memarlarından biri olan Türkiyə Prezidenti Rəcəb Tayyib Ərdoğana heykəl ucaldılsın. Düşünürəm ki, bu təklif bütün xalqımızın ürəyindən olar. Azərbaycan xalqı qədirbilən xalqdır”, - deputat “AzPolitika”-ya açıqlanmasında deyib.

“Ola bilsin, kimlərsə hesab edir ki, sağlığında siyasətçilərə, böyük şəxsiyyətlərə heykəl ucaltmaq düz deyil. Əlbəttə, bu üç böyük şəxsiyyət onsuz da xalqımızın qəlbində ömürlük taxt qurublar. Amma mən hesab edirəm ki, insanlara elə sağlığında layiq olduqları qiyməti vermək lazımdır. Ona görə də, Şuşanın ən uca zirvəsində, ola bilsin ki, elə “Xarıbülbül” musiqi festivalının keçirildiyi yerdə bu üç Böyük Türk Oğluna, Türk Sərkərdəsinə möhtəşəm abidələr ucaldılmalıdır!”, - S.Qurbanov fikrini belə əsaslandırıb.
Ordumuz sərhədi bərpa edir - Nikol təcili TŞ-ni topladıNikol Paşinyan Təhlükəsizlik Şurasının iclasını keçirir. İclasın gündəliyi açıqlanmasa da, Zəngəzurda (Sünik) baş verənlərin - Azərbaycan Ordusunun dövlət sərhədini bərpa etmək məqsədilə Gorus istiqamətində 3 kilometrə qədər irəliləməsi məsələsinin müzakirə edildiyi şübhəsizdir.

Erməni mediası yerli mənbələrə istinadən Azərbaycan Ordusunun irəli çəkdiyi mövqelərdən geri çəkilmədiyini yazır. Danışıqlar nəticə verməyib, sabah yenidən cəhd edəcəklər.

Ermənistan xarici işlər naziri vəzifələrini icra edən Ara Ayvazyan rusiyalı həmkarı Lavrovla danışıb və Azərbaycanın əvvəlki mövqeyə qaytarılmasını xahiş edib. Ardınca Rusiya müdafiə naziri Sergey Şoyqu və Ermənistan müdafiə naziri vəzifəsini icra edən Vaqraşak Arutyunyan arasında telefon söhbəti olub. Rəsmi məlumata görə, tərəflər Qarabağdakı rus sülhməramlıların fəaliyyətini müzakirə ediblər. Lakin Laçın-Gorus sərhədində baş verənlərin müzakirə edildiyi də istisna deyil.

Mümkündür ki, Ermənistan telefon trafikində ruslardan istədikləri dəstəyi almayıblar. Çünki məsələ dövlət sərhədinin bərpasından gedir və bu məsələnin başa çatdırılması ilə bağlı Moskvanın vasitəçiliyi ilə şifahi razılaşmalar var. Paşinyanın Təhlükəsizlik Şurasının iclasını keçirməsi də bununla bağlıdır və iclasda daha çox bu hadisədən sonra Zəngəzurda yarana biləcək gərginliyin qarşısını almaq məsələsi müzakirə oluna bilər.

Asif Nərimanlı
"Şuşada təməli qoyulan məscid İlham Əliyevin adını daşısın"Qüdrət Həsənquliyev: "İlham Əliyev bu haqqı əldə edib'

Məlum olduğu kimi Şuşa şəhərində səfərdə olan Azərbaycan Prezidenti İlham Əliyev burada yeni məscidin təməlini qoyub.

Bütöv Azərbaycan Xalq Cəbhəsi Partiyasının sədri, millət vəkili Qüdrət Həsənquliyev BayMedia-nın sorğusuna cavabında Şuşada yeni məscidin inşa edilməsini alqışladığıni bildirib və təməli qoyulan məscidlə bağlı təşəbbüslə çıxış edib. BAXCP sədri deyib: "İlham Əliyev o haqqı əldə edib ki, Şuşada təməlini qoyduğu məscid onun adını daşısın.
Ümid edirəm Qafqaz Müsəlmanları İdarəsi,Respublika Ağsaqqallar Şurası, siyasi və ictimai təşkilatlar bu ideyanı dəstəkləyəcək".
Azərbaycan Ordusu Zəngəzur istiqamətində irəlilədi – TəciliAzərbaycan Ordusu Zəngəzur (Sünik) istiqamətində irəliləyib.

Axar.az xəbər verir ki, bu barədə erməni mediasında yayılan məlumatı Ermənistan Müdafiə Nazirliyi təsdiqləyib.

Ermənistan MN-dən bildirilib ki, Azərbaycan Ordusunun sərhədlərin dəqiqləşdirilməsi çərçivəsində bir istiqamətdə irəlilədiyi müəyyənləşib. Ancaq Azərbaycan Ordusunun irəlilədikləri yerdə mühəndis işlərinin görməsinə etiraz edilib və hazırda situasiyanın nizamlanması üçün müzakirələr gedir.

Ermənistan MN İşxanasar istiqamətində döyüş getdiyi barədə erməni mediasında yayılan məlumatı təkzib edib və sərhəddə heç bir gərginlik olmadığını bildirib.
Qalib Azərbaycanın masadakı gücü: “İrəvan Bakıya möhtacdır” - Partiya sədriAzərbaycan 27 sentyabrda Qarabağı işğaldan azad etmək üçün Vətən savaşına başladı və 44 gün sonra rəsmi olaraq 28 illik işğala son qoydu.

Bununla da Dağlıq Qarabağ münaqişəsi həll olundu. Buna qədər münaqişənin həlli ilə bağlı “çalışan” beynəlxalq qurumlar, ATƏT-in Minsk Qrupu və digər təşkilatlar münaqişəni “ölü nöqtə”dən tərpədə bilməməklə yanaşı, problemin həllini daha da çətinləşdirmişdi.

Eyni zamanda, BMT-nin qəbul etdiyi 4 qətnamə də icra olunmamışdı. Nəticədə Azərbaycan öz işini özü görməli oldu və Dağlıq Qarabağ münaqişəsini müharibə yolu ilə həll etdi, torpaqlarımız erməni işğalından azad olundu.

Döyüşlər bitəndən sonra masa arxasında da Azərbaycan ciddi iradə ortaya qoydu. Bu gün döyüş meydanında olduğu kimi, Azərbaycan masa arxasında da güclüdür. Döyüş meydanında qazanılmış qələbə düşməni məcbur etdi ki, kapitulyasiya aktına imza atsın. Noyabrın 10-da imzalanmış sənəd məhz Ermənistanın kapitulyasiya aktı, təslimçilik sənədidir.

Azərbaycanda ayrıca Dağlıq Qarabağ vahidi yoxdur, münaqişə həllini tapıb. Bundan sonra isə Ermənistanın üzərinə düşən məsələ 10 noyabr (2020) və 11 yanvar (2021) razılaşmalarında üzərinə götürdüyü öhdəlikləri birmənalı şəkildə icra etməkdir. Azərbaycanın 44 gündə apardığı beşinci nəsil müharibəni birbaşa görən Ermənistan üçün başqa çıxış yolu da qalmır.

Azərbaycan Liberal Demokrat Partiyasının (ALDP) sədri Fuad Əliyev Cebhe.info-ya açıqlamasında deyib ki, Ermənistan bu gün bütün sahələrdə meydanda tək qalıb. Rusiyaya “xəyanət edib” Qərbə üz tutan, onun “ətəyindən yapışan” işğalçı ölkəyə indi Avropa da yaxın durmur:

“Çünki Azərbaycan bu ölkəni qarşısında diz çökdürdü, rəzil etdi. Dünya Ermənistanın rəzil durumuna acıyır, amma yaxın durmur. Artıq 44 günlük müharibədə Azərbaycanın Ermənistan və onu himayə edənlər üzərində qazandığı qələbə dünyanın ermənipərəst ölkələrini hələ də şokda saxlayıb. Bu gün Ermənistan yalnız Azərbaycandan asılı vəziyyətdədir, Bakıya möhtacdır. Bunu ermənilər də, Rusiya da, Qərb də yaxşı anlayır. Bu gün Ermənistanda daxili ziddiyyətlər fonunda rəsmi Bakıya qarşı təhdidlər növbədənkənar parlament seçkilərinə hesablanan təbliğat vasitəsidir. Artıq karvan keçib, itlər isə hələ hürməkdədir. Bu təhdidlər qalib Azərbaycana heç bir təsir göstərməyəcək. Azərbaycan nəyə qadir olduğunu dünyaya sübut etdi, 44 gündə əldə etdiyi qələbə ilə münaqişənin hərb yolu ilə həllinin mümkünsüzlüyünü iddia edən və 30 il ermənipərəst mövqe nümayiş etdirən qüvvələrə ağır və sarsıdıcı zərbə vurdu. Ermənistanın ipi tarixən başqa ölkələrin əlində olub. Hara çəkiblər ora gedib”.

Partiya sədri əlavə edib ki, Ermənistanın bugünkü revanişt açıqlamaları da sifarişdir:

“Azərbaycanı heç bir qüvvə qorxuda, rəsmi Bakı ilə təhdid dilində danışa bilməz. İnanmıram ki, bundan sonra Ermənistan bir daha işğalçılıq fikrinə düşə və məkrli niyyətini həyata keçirə. Ölkə rəzil durumdadır, iqtisadiyyat, həyat çöküb, əhali ölkəni tərk edir, aclıq, səfalət içindədir. Xaricdəki diaspor təşkilatları da daha yardım göstərmir. Ermənistana bu vaxtadək rəhbərlik edən şəxslər separatçılar, terrorçular, həbsxanada yatanlar olublar. İndi Ermənistana normal bir şəxs rəhbərlik etməlidir ki, ölkəsini ağılla, təfəkkürlə, normal düşüncə ilə bataqlıqdan çıxara bilsin. Ermənistan qonşu ölkələrə ərazi iddiasından əl çəkməli, qonşularla münasibətini normallaşdırmalı, işğalçılıq, terror siyasətinə son verməli, müstəqil olmalı, başqa ölkələrin quluna çevrilməməli, asılı vəziyyətə düşməməlidir. Nə qədər ki, işğalçı bu çevrənin içindədir, ölkə tamamilə məhv olacaq”.

Rusiyadan “Laçın dəhlizi” ilə bağlı AÇIQLAMA“Laçın dəhlizi”ndə patrul xidməti Qarabağdakı Rusiya sülhməramlı kontingentinin hərbi polis bölməsi tərəfindən aparılır.

Bu barədə Rusiya Müdafiə Nazirliyinin mətbuat xidmətinin məlumatında bildirilib.

Qeyd olunur ki, Rusiya sülhməramlıları atəşkəsə əməl olunmasına nəzarət və nəqliyyatın təhlükəsizliyinin təmin edilməsi, “Laçın dəhlizi” boyunca ərzaq məhsulları və müxtəlif malların daşınması vəzifələrini davam etdirirlər.

Məlumatda bildirilib ki, ötən ilin 12 noyabrdan bəri Rusiyanın Qarabağdakı sülhməramlı kontingentinin hərbi polis bölməsi “Laçın dəhlizi”ndə hər gün keşik çəkir.

“Bu patrulun məqsədi atəşkəs razılaşmasının icrasını izləmək, məlumat toplamaq, ərazinin müşahidə məntəqələrindən görünməyən sahələrini yoxlamaq və Rusiya sülhməramlı kontingentinin mövcudluğunu nümayiş etdirməkdir”-deyə Rusiya Müdafiə Nazirliyindən bildirilib .

Hərbi polis bölməsinin zabiti, polkovnik-leytenant İvan Kuzminin verdiyi məlumata görə, Rusiya sülhməramlı kontingenti müqavilələrə uyğun olaraq nəzarəti yalnız “Laçın dəhlizi”ndə deyil, 5 kilometrə qədər eninə yaxınlaşmalarda da həyata keçirir.

Onun sözlərinə görə, dəhlizdə hava şəraitinə baxmayaraq hər gün keşik çəkilir. İvan Kuzmin deyib ki, ən çətin dövr dəhlizdə sıx dumanın olduğu və yolun buzlaşdığı dekabr - yanvar ayları idi.

Rusiya sülhməramlı kontingentinin hərbi polisi tərəfindən nəzarət edilən patrul yollarının gündəlik uzunluğu təxminən 50 kilometrə bərabərdir.

Rusiya sülhməramlı kontingentinin hərbi polis bölməsi dəhlizdə keşik çəkməklə yanaşı, müntəzəm olaraq humanitar aksiyalar zamanı təhlükəsizliyin təmin edilməsində iştirak edir, zəvvarları sərhəd xəttinin yaxınlığında yerləşən kilsələrə gedərkən müşayiət edir.
İran səfiri Azərbaycan xalqını və dövlətini təbrik edibİran İslam Respublikasının Azərbaycandakı səfiri Seyid Abbas Musəvi Ramazan bayramı münasibətilə Azərbaycan xalqınl və dövlətini təbrik edib.

Səfirlikdən Avrasiya.net-ə daxil olan təbrikdə deyilir:

Müsəlman, dost və qardaş Azərbaycan Respublikası dövlətini və xalqını mübarək Ramazan (Fitr) bayramı münasibətilə təbrik edirəm. Allahın sonsuz nemət, bərəkət və rəhmət ayı ilə vidalaşaraq, Şəvval ayının daxil olması və mübarək Ramazan bayramına görə şükr edir, Allahın dərgahından bütün müsəlmanlar, xüsusilə Azərbaycan Respublikası xalqı üçün cansağlığı, sülh, əmin-amanlıq, mənfur koronavirus pandemiyasının tezliklə bitməsini arzu edir və ibadətlərin qəbul olunmasını diləyirəm.